Bo mdza ye hurende ?
Tabu uzi wonawo randzi wa zalwa

Bo mdza ye hurende ?
Huzalwa nyora wuke mwanamshe mdahoni
Rangu yapvo kutsu saza
Rangu utitini hata lewo
zehazi zadaho huzirengue
Wutapiliye wo wandru ho dahoni
Wakewema
Wuwapishiye, wuwafuliye
Wuwakelentsize yeka ngawo wawade
Wangaliye ye makoko no wana wo dahoni

Bo mdza ye hurende ?
Hu kubali ye hazi waninkiwa
Hasibabu yiyo ndo mkayo wa mwanamshe mkomori

Bo mdza ye hurende ?
Ye ze raha zahe dunia huparo ziwona usiko
Ze rongowo wafanya hemayesha yahaho
Huzifanya ba hwambilwa, no wudjipvize wo wahuzaya

Bo mdza ye hurende ?
Hu yenshi mayesha madziro
Ne mrume yahulola kudja mtsuguwa
Ngo yesheleyo zesiku zahada pvadzima
Ze dronso ne harara yoka dawe namdru
Wutso humjuwa, wutso humwandza
Sha hukubali hasibabu yo nde ndziya
Ya mwanamshe mkomori
Ya lolwa yadje yazaye

Bo mdza ye kudja lemewa ?
Lewo yinu huzaya wana washe na wanawume
Hurilele so wontsi heli wowahuzaya
Wahulela dawe no wanawuma haho
Ndrongo dzima wa badili
Hukubali risome harimwa yelikoli ya shizungu
Sha leyo yinu ngiyona mana hindri ?
Kutsu ririhiza rendeleya yemisomo radjo hundra hazi
Pvohaho djuwu ye muhimo nde ndola

Bo mza ye kudja lemewa ?
Kudja lemewa wumeya mapesa
ye maha wa hondra na mrume wahaho
no wanawuma haho no wandjomba haho
Yiyo nde ndziya wandzawo ridungue

Bo mdza yezembi rafanya ndazi ?
Hudiwaza zembi zahe mayesha yahaho
Wanawumahatru gwafanyawo yizo wandzawo
Sha sisi ritsifanye yizo wafanyawo
Gowarontsi watsunguwe yemayesha yahawo

Bo mdza yezembi ndziro wawona duniyani dazi
Wandzawo urilipvise
Ze tabu kazina wuparo kaza kifu
Huwono madzi halafu gwandzo ri yale pvatru
Hata mrume gwandzo uribandzeye

Bo mdza ye ngawe ndahu ?
Yeka riharaya ye ndziya wandzo rirengue
Ne mrume wa ritsunguliya
Gwambo ngodjo rilapva

Bo mdza
Gamdjuwo huka yendziya na tsuguwa ke tsuhu djipviza
Sha ndja hudiwaza
No ndja diwaza yiho napuha

Bo mdza
Mwana yalelwa ndewudjo shinda ya djuse wa mzaya
No wa mlela
Yewona raha ngudjo handza ya wadjibize
Ngudjo kana roho ndjema no wa mhusu
Ngudjo kana mwendo mwema
Mdru wulo mwema hoyi tswani katsaha baya na wumani
Yewutsaha amani yaduniya

Bo mdza ni swamihi yeka tsi kosa
Gamwombo mgu wuke namuwo
Wuniwone ne rendeha hindru
Wuhundre yemavuna ya he malezi yahaho
Mgu nohafadhi

Retrouvez d’autres articles en l’honneur de la mère :